Heathcote William Garrod, comp. (1878–1960). The Oxford Book of Latin Verse. 1912.

Ausonius c.310–c.395

Dedication

‘CVI dono lepidum nouum libellum?’

Veronensis ait poeta quondam,

inuentoque dedit statim Nepoti.

at nos inlepidum, rudem libellum,

burras quisquilias ineptiasque,

credemus gremio cui fouendum?

inueni, trepidae silete nugae,

nec doctum minus et magis benignum,

quam quem Gallia praebuit Catullo.

hoc nullus mihi carior meorum,

quem pluris faciunt nouem sorores,

quam cunctos alios, Marone dempto.

Pacatum haut dubie, poeta, dicis.

ipse est. intrepide uolate, uersus,

et nidum in gremio fouete tuto.

hic uos diligere, hic uolet tueri:

ignoscenda teget, probata tradet:

post hunc iudicium timete nullum.