The Siller Croun

Susanna Blamire (1747–1794)

“AND ye sail walk in silk attire,

And siller hae to spare,

Gin ye ’ll consent to be his bride,

Nor think o’ Donald mair.”

O, wha wad buy a silken goun

Wi’ a puir broken heart?

Or what ’s to me a siller croun

Gin frae my love I part?

The mind whose meanest wish is pure

Far dearest is to me,

And ere I ’m forced to break my faith,

I ’ll lay me doun an’ dee.

For I hae vowed a virgin’s vow

My lover’s fate to share,

An’ he has gi’en to me his heart,

And what can man do mair?

His mind and manners won my heart:

He gratefu’ took the gift;

And did I wish to seek it back,

It wad be waur than theft.

The langest life can ne’er repay

The love he bears to me,

And ere I ’m forced to break my faith,

I ’ll lay me doun an’ dee.