12. Balade

TANT avez fait par vostre grant doulçour,

Trés doulz ami, que vous m’avez conquise.

Plus n’y ara convient complainte ne clamour,

Ja n’y ara par moy deffense mise.

Amours le veult par sa doulce maistrise,

Et moy aussi le vueil, car, se m’ait Dieux,

Au fort c’estoit folour quant je m’avise

De reffuser ami si gracieux.

Et j’ay espoir qu’il a tant de valour

En vous, que bien sera m’amour assise,

Quant de beaulté, de grace et tout honnour

Il y a tant que c’est drois qu’il souffise;

Si est bien drois que sur tous vous eslise;

Car vous estes digne d’avoir trop mieulx,

Et j’ay eu tort, quant tant m’avez requise,

De reffuser ami si gracieux.

Si vous retienne et vous donne m’amour,

Mon fin cuer doulz, et vous pri que faintise

Ne soit en vous, ne nul autre faulx tour;

Car toute m’a entierement acquise

Vo doulz maintien, vo maniere rassise,

Et vos trés doulx amoureux et beaulz yeux.

Si aroye grant tort en toute guise

De refuser ami si gracieux.

Mon doulz ami, que j’aim sur tous et prise,

J’oy tant de bien de vous dire en tous lieux

Que par raison devroye estre reprise

De reffuser ami si gracieux.