1. Belle Érembor

QUANT vient en mai que l’on dit as lons jors,

Que Franc de France repairent de roi cort,

Reynauz repaire devant el premier front,

Si s’en passa lez lo meis Erembor,

Ainz n’en dengna le chief drecier amont.

E! Reynaut amis!

Bele Erembors à la fenestre au jor

Sor ses genolz tient paile de color.

Voit Frans de France qui repairent de cort

E voit Reynaut devant el premier front.

En haut parole, si a dit sa raison:

‘E! Reynaut amis!

‘Amis Reynaut, j’ai jà véu cel jor

Se passisoiz selon mon pere tor,

Dolans fussiez se ne parlasse à vos.

—Jel mesfaïstes, fille d’empereor.

Autrui amastes, si obliastes nos.

—E! Reynaut amis!

‘Sire Reynaut, je m’en escondirai;

A cent puceles sor sainz vos jurerai,

A trente dames que avuec moi menrai,

C’oncques nul home fors vostre cors n’amai.

Prennez l’emmende, et je vous baiserai.

E! Reynaut amis!’

Li cuens Reynauz en monta lo degré.

Gros par espaules, greles par lo baudré,

Blonde ot lo poil menu recercelé,

En nule terre n’ot si biau bacheler.

Voit l’Erembors, si comence à plorer.

E! Reynaut amis!

Li cuens Reynauz est montez en la tor,

Si s’est asis en un lit point à flors,

Dejoste lui se siet bele Erembors;

Lors recomencent lor premieres amors.

E! Reynaut amis!