Contents -BIBLIOGRAPHIC RECORD

Francis T. Palgrave, ed. (1824–1897). The Golden Treasury. 1875.

Carolina Oliphant, Lady Nairne

CLVII. The Land o’ the Leal

I’M wearing awa’, Jean,

Like snaw when it’s thaw, Jean,

I’m wearing awa’

To the land o’ the leal.

There’s nae sorrow there, Jean,

There’s neither cauld nor care, Jean,

The day is aye fair

In the land o’ the leal.

Ye were aye leal and true, Jean,

Your task’s ended noo, Jean,

And I’ll welcome you

To the land o’ the leal.

Our bonnie bairn’s there, Jean,

She was baith guid and fair, Jean;

O we grudged her right sair

To the land o’ the leal!

Then dry that tearfu’ e’e, Jean,

My soul langs to be free, Jean,

And angels wait on me

To the land o’ the leal.

Now fare ye weel, my ain Jean,

This warld’s care is vain, Jean;

We’ll meet and aye be fain

In the land o’ the leal!