Contents -BIBLIOGRAPHIC RECORD

Thomas Humphry Ward, ed. The English Poets. 1880–1918.rnVol. III. The Eighteenth Century: Addison to Blake

Robert Burns (1759–1796)

My Nanie, O

BEHIND yon hills where Lugar flows,

’Mang moors an’ mosses many, O,

The wintry sun the day has closed,

And I ’ll awa to Nanie, O.

The westlin wind blaws loud an’ shill:

The night ’s baith mirk and rainy, O!

But I ’ll get my plaid, an’ out I ’ll steal,

An’ owre the hill to Nanie, O.

My Nanie ’s charming, sweet, an’ young;

Nae artfu’ wiles to win ye, O:

May ill befa’ the flattering tongue

That wad beguile my Nanie, O.

Her face is fair, her heart is true,

As spotless as she ’s bonie, O:

The op’ning gowan, wat wi’ dew,

Nae purer is than Nanie, O.

A country lad is my degree,

An’ few there be that ken me, O;

But what care I how few they be?

I ’m welcome ay to Nanie, O.

My riches a’s my penny-fee,

An’ I maun guide it cannie, O:

But warl’s gear ne’er troubles me,

My thoughts are a’, my Nanie, O.

Our auld Guidman delights to view

His sheep an’ kye thrive bonie, O;

But I ’m as blythe that hauds his pleugh,

An’ has nae care but Nanie, O.

Come weal, come woe, I care na by,

I ’ll tak what Heaven will sen’ me, O;

Nae ither care in life have I,

But live, an’ love my Nanie, O.